Жоламан Шаршенбеков менен Акжол Махмудов Бириккен күрөш дүйнөсүнөн (United World Wrestling) акчалай сыйлык алат. Бул тууралуу аталган уюмдун сайтында кабарланды.
Маалыматка караганда, грек-рим күрөшү боюнча ар бир салмактан үч алдыңкы балбанга 10 миң доллар бөлүнүп берилет. Рейтингде биринчи орунда турган балбанга 5 миң доллар, экинчиге 3 миң жана үчүнчүгө 2 миң доллар бөлүнөт.
Рейтингде 60 кг салмакта биринчи орунда турган Жоламан Шаршенбеков 5 миң доллар, ал эми 77 кг салмакта тизменин экинчи сабында жайгашкан Акжол Махмудов 3 миң доллар алат.
Белгилей кетсек, Жоламан Шаршенбеков менен Акжол Махмудов 2022-жылдын 10-18-сентябрында Белград шаарында өткөн күрөш боюнча дүйнө чемпионатында алтын медаль уткан.
