Бүгүн, 22-сентябрда мамлекеттик жана коомдук ишмер Жусуп Абдрахманов менен Акматбек Сүйүмбаевдин жакындарына «Кыргыз Республикасынын Баатыры» эң жогорку артыкчылык даражасы тапшырылды.
Президент Садыр Жапаров өз сөзүндө мамлекеттик ишмерлер Жусуп Абдрахманов менен Акматбек Сүйүмбаевдин өлкөнүн мамлекеттүүлүгүн түзүү жана чыңдоодогу эбегейсиз эмгегин белгиледи.
Мамлекет башчысы ошону менен бирге дарыгер, мугалим, машыктыруучу, укук коргоочу жана башка ар кыл тармактын өкүлдөрүнө өлкөнүн социалдык-экономикалык, интеллектуалдык жана маданий дараметин өнүктүрүүгө кошкон олуттуу салымы, көп жылдык жемиштүү эмгеги үчүн ыраазычылык билдирди.
Сыйлык Конституцияны иштеп чыгууга активдүү катышкандарга да ыйгарылды.
Кыргыз Республикасынын мамлекеттик сыйлыктарын салтанаттуу тапшыруу аземи өлкөнүн эгемендүүлүгүнүн 30 жылдыгынын урматына уюштурулган.