Зордуктоо менен кармалгандар эми жоопкерчиликтен оңой кутула албайт. Президент Садыр Жапаров кылмыш-жаза кодексине өзгөртүү киргизүүнү караган мыйзамга кол койду.
Ага ылайык, оор кылмыштар боюнча, анын ичинде зордуктоо иштерин тергөөнү тараптардын жарашып алган учурда токтотуу нормасы алынып салды. Башкача айтканда жабыркаган тарап тосмо арыз берген учурда да иш тергелип, сотко өтөт. Жыныстык кол тийбестик боюнча кылмыштарды алдын алуу максатында, жоопкерчиликтен качууга шарт түзгөн жылчыктарды алып салуу боюнча ченемдер киргизилген.
Тактап айтканда, жыныстык кол тийбестикке каршы кылмыштардын эскирүү мөөнөтүн, пробациялык көзөмөлдү колдонуу, күрөөгө бошотуу мүмкүнчүлүктөрү да алынып салынды.
