Бүгүн, 17-октябрда Бишкекте Кыргызстандын Көк-бөрү федерациясынын кезектеги жыйыны өттү. Анда, Талас Бегалиев мандатын тапшырып, анын ордуна Рамис Жунусалиев Көк-бөрү федерациясынын президенти болуп шайланды.
Жыйында Башкы прокурор Курманкул Зулушев коопсуздук, тартип сакталбаса, мамлекеттик иш-чараларда көк-бөрү оюну өтпөй турганын айтты.
“Кечээ Кочкордо Ормон Хандын 230 жылдыгында ат оюндары өттү. Бирок көк-бөрү өткөн жок. Баарыңыздар көрдүңүздөр, сездиңиздер… Президент Садыр Нургожоевичтин сөзүн айтайын. Ал Оштогу 31-август Эгемендик күнүндө болгон оюндан кийин, эгер дагы бир жолу ушундай тартипсиздик кайталанса, мамлекеттик деңгээлдеги оюндарга убактылуу көк-бөрүнү кошпой эле коюңуздар деди. Себеби, коомчулукка, мамлекеттин коопсуздугуна терс таасир тийгизет. Ошондуктан алтын баштуу улакчы болсо да эрежени одоно бузса, жазалашыбыз керек», — деген Зулушев.
Эскерте кетсек, Оштогу «Төлөйкөн» ат майданында Эгемендик күнүндө президенттин кубогу үчүн көк-бөрү мелдешинин соңунда жаңжал чыккан.
