Жогорку сот Алымкадыр Бейшеналиевдин мурдагы кеңешчиси Мээрим Тилекованы толугу менен актады. Бул тууралуу юрист Кайсын Абакиров социалдык тармактагы баракчасына жазды.
Маалыматка ылайык, Жогорку Соттун 4-декабрындагы чечими менен Саламаттыкты сактоо министринин мурдагы кеңешчиси Мээрим Тилекова Кылмыш-жаза кодексинин 41-беренесинин 3-бөлүгү, 337-беренесинин 2-бөлүгүндө каралган кылмыш иши боюнча толугу менен акталган.
Эскерте кетсек, 1993-жылы туулган Мээрим Тилекованы УКМК былтыр 17-майда опузалап пара талап кылууга шектеп кармаган. Ушундай эле берене менен Саламаттык сактоо министрлигинин Ысык-Көл облусундагы координатору Бейшекан Жайлымышева да айыпталган. Ал дагы акталып, кайрадан өз кызматына отурду.
