Жалал-Абад шаарындагы №1 М. Бабкин атындагы мектебинин 6-классынын окуучулары Альбина Самаганова жана Айлин Есеналиева Дубайда өткөн эл аралык олимпиадада математика сабагынан I орунду багындырышты. Бул тууралуу Билим берүү жана илим министрлигинен билдиришти.
Шаардык билим берүү бөлүмүнүн башчысы Ырысбек Калчаев бул жеңиш — окуучуларыбыздын үзүрлүү эмгегинин, мугалимдердин талыкпаган мээнетинин жана билимге умтулган жаш муундун өжөрлүгүнүн жемиши экенин белгиледи.
Окуучуларды жана алардын ата-энелерин Жалал-Абад шаарынын мэри Эрнисбек Ормоков кабыл алып, ийгиликтери менен куттуктап, мэриянын ыраазычылык баракчасын тапшырды.
Дубайда өткөн эл аралык олимпиадага сегиз мамлекеттен 3 миңден ашуун окуучу катышкан.
