Уюшкан кылмыштуу топту каржылаган жана опузалап акча талап кылган кылмыштуу топтун мүчөлөрү кармалганын УКМК кабарлады.

Алардын катарында бир кезде ИИМ системасында иштеген Б.Т.К. маркум Дөө Чыңгыздын өкүл атасы болгону айтылат. Күч структураларындагы ишенимдүү булактар кеп Талас Бегалиев жөнүндө болуп жатканын билдиришти. Мындан тышкары, Т.Ч. жана Т.А.Т. кармалган.

Т.А.Т. — Асейин Төрөгелдиев экенин кабарлашты. Атайын кызмат ал Олимпиадалык резервдеги балдар-өспүрүмдөр спорт мектебин жетектеп, жаштарды кримчөйрөгө тартып турганы белгиленди.

«Көлбаевдин кылмыштуу тобунун лидерлери Анапияев жана Жумагулов Б.Т.К. менен сүйлөшүп алып, бир кишини курал менен коркутуп, 2 гектар жерин тартып алганын билдирди. Кийинчерээк ал жер анын жакын тууганына катталган», — деп айтылат маалыматта.

Мындан тышкары, үч шектүү дагы бир кишини 300 миң долларга опузалап, акчаны Көлбаевге өткөрүп беришкен. Б.Т.К. ИИМде иштеп турган маалда Көлбаевдин тобун калкалап, кызматтык маалыматтарды берип турганы кошумчаланды.

16-майда аталган адамдар кармалып, Бишкек шаарынын Октябрь райондук сотунун чечиминин негизинде Жазаларды аткаруу мамлекеттик кызматынын №21 мекемесине камакка алынды.