Кыргызстандын грек-рим күрөшү боюнча улуттук курама командасынын мүчөлөрү “Ulaan-Baatar Open” эл аралык мелдешинде алтын медалга ээ болду.
Дене тарбия жана спорт мамлекеттик агенттигинен билдиришкендей, мелдеш Монголиянын Улан-Батор шаарында өтүп жатат.
Алсак, балбан Раззак Бейшекеев мелдешке 67 кг чейинки салмак категориясында катышты. Ал биринчи айлампада индиялык балбанды, экинчи айлампада түркиялык балбанды жеңип, алтын медалга татыды.
Ал эми Асан Жанышов 87 кг чейинки салмак категориясында катышып, биринчи айлампада монголиялык балбанды 8:0 эсебинде, экинчи айлампада индиялык балбанды 9:0 эсебинде жеңген. Кыргыз балбаны чечүүчү беттеште түркиялык балбанды жеңип эл аралык мелдештин жеңүүчүсү аталды.
Ал эми спортчу Үзүр Жусупбеков 97 кг чейинки салмак категориясында катышты. Биринчи айлампада монголиялык балбанды 10:6 эсебинде, экинчи айлампада монголиялык балбанды 9:1 эсебинде жеңген. Жусупбеков чечүүчү беттеште индиялык балбанды 5:4 эсебинде утуп, алтын медалга ээ.
