Борбор Азия аркылуу Европага күчтүү баңгизат болуп эсептелген героинди жеткирип жүргөн эл аралык кылмыштуу топтун ишине бөгөт коюлду. Бул тууралуу УКМК кабарлады.
Буга чейин козголгон кылмыш ишин тергөөнүн натыйжасында Бишкектин аймагынан жалпы салмагы 174 килограмм 800 грамм героин табылган. Кыргызстанда анын баасы 130 миллион сомдун тегерегинде болсо, Европада 600 миллион сомго бааланары айтылды.
Башка өлкөлөрдүн укук коргоо органдары менен биргеликте жүргүзүлгөн атайын операциянын жүрүшүндө эл аралык баңгизат каналынын уюштуруучулары жана мүчөлөрү кармалды. Учурда тергөө иштери уланууда.
