Кыргызстандын улуттук коопсуздугун чагылдырган жаңы фильм тартылды. «Улуттук коопсуздук» аттуу тасма УКМКнын түздөн-түз колдоосу менен жаралууда. Бул тууралуу тасманын продюсери Бектемир Мамаюсупов 7-каналга билдирди.
Фильм өлкө эгемендүүлүккө жеткен учурдан баштап бүгүнкү күнгө чейинки тарыхый жолду, коомдогу өзгөрүүлөрдү жана кылмыштуулук менен болгон принципиалдуу күрөштү чагылдырат.
Башкы каарман Азат — күч түзүмдөрүндө иштеп жүрүп, өлкө тарыхындагы бурулуш учурлардын күбөсү болот. Сценарийди жана көркөм өнөрдү чеберчилик менен айкалыштырган тасма Бишкек шаарында жана Ысык-Көл облусунда 4-майдан 30-июнга чейин тартылган. Кинону элге сунуу күз мезгилине пландалууда.
Фильмде белгилүү кыргыз актерлору менен катар жаңы жүздөр да роль жаратты. Бул тасма улуттук коопсуздуктун маңызын элге жакын ыкма менен жеткирүүнү максат кылат.
