Бишкекте жабырлануучудан алимент өндүрүп берүү үчүн пара алып жаткан жеринен сот аткаруучулар кызматындагы коррупциянын бети ачылды. Бул тууралуу УКМКнын басма сөз кызматы билдирди.
Тактап айтканда, Биринчи Май райондук сот аткаруучулар кызмат бөлүмүнүн сот аткаруучусу, юстициянын капитаны Ж.А.М. тарабынан уюштурулган коррупциялык схеманын бети ачылган.
“Жүргүзүлгөн кылмыш ишинин алкагында, ыкчам-иликтөө иш-чараларынын жүрүшүндө аталган кызматкер, жарандан алимент өндүрүү маселесин чечип берүү үчүн талап кылып жаткан 35 000 сом өлчөмүндөгү акчаны алып жаткан жеринен кармалды. Учурда тергөө амалдары жүрүп, кармалган жаран тарабынан мыйзамсыз иш алып баруусу мүмкүн болгон башка фактылар текшерилүүдө”, — деп берилет маалыматта.
КР УКМК эскертет: коррупциянын бардык фактыларына, анын ичинде калкты социалдык жактан коргоо чөйрөсүндөгү мыйзамсыз аракеттерге катуу бөгөт коюлат.
