Бүгүн парламенттин жалпы жыйынында «VII чакырылыштагы Жогорку Кеңештин өзүн-өзү таркатуусу жөнүндө» токтомунун долбоору каралып, эл өкүлдөрү аны колдоого алды.
Аталган маселе боюнча маалыматты депутат Улан Примов тааныштырып, демилгечи топко 32 депутат киргенин билдирди.
«Эмдиги жылы эки маанилүү окуянын, тагыраагы президенттик жана парламенттик шайлоолордун удаа келгендигине байланыштуу ортодогу айырма кыска убакытты түзүп калууда. Ошондуктан демилгечи топ өлкөдөгү саясий системаны жана туруктуулукту чыңдоо максатында парламентке өз ыйгарым укуктарын ыктыярдуу түрдө тапшырууну сунуштайт», — деди эл өкүлү.
Добуш берүүнүн жыйынтыгында 84 депутат демилгечи топтун Жогорку Кеңештин VII чакырылышынын өзүн-өзү таркатуу боюнча сунушун колдоду.
Эске салсак, Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитет 23-сентябрда, Жогорку Кеңештин Координациялык кеңеши 25-сентябрда КР Жогорку Кеңешинин VII чакырылышынын өзүн-өзү таркатуу жөнүндө сунушун караган.
