Тюмень шаарынын Калинин райондук соту, Орусиянын чек арасын мыйзамсыз кесип өткөн кыргызстандык жаранды 7 ай эркинен ажыратып, түзөтүү колониясына камады. Бул тууралуу облустук сот тутумунун бирдиктүү маалымат кызматы билдирди.
Басма сөз кызматынын маалыматына караганда, соттолуучу буга чейин Орусиядан беш жылга депорттолгон. Бирок 2022-жылы жеке маалыматтарын өзгөртүп, жаңы паспорт алып, Рощино аэропорту аркылуу кайрадан Россияга кирген.
Соттук отурумда ал күнөөсүн толугу менен мойнуна алып, ишти өзгөчө тартипте кароону өтүндү. Жагдайларды эске алуу менен ал жети айга эркинен ажыратылып, түзөтүү колониясына кесилди.
