Түп айылындагы А.Карымшаков атындагы жалпы билим берүү мектебинин окуучуларын акысыз мектепке жеткирүү үчүн автобус каттамы уюштурулду. Бул тууралуу “Turmush” басылмасы Түп айыл өкмөтүнүн жетекчилигинин маалыматына таянып жазып чыкты.
Маалыматка ылайык, каттам күнүнө алты ирет жүргүзүлүлөт.
Буга чейин аталган мектептин окуучулары айылдын алыскы аймактарынан жөө каттап келишкен. Окуучуларга ыңгайлуу шарт түзүү максатында Кыргызстан менен «Евразия» автономиялуу коммерциялык эмес уюмунун ортосундагы келишимдин алкагында 2024-жылы Россияда өндүрүлгөн 22 орундуу автобус тапшырылган. Окуучулар үчүн бөлүнгөн «Евразия» автобусу айыл өкмөтүнүн балансына алынган.
