Борбордук шайлоо комиссиясы талапкерлерге, саясий партияларга жана алардын өкүлдөрүнө шайлоо фондун түзүү, каражат чогултуу боюнча билдирүү таратты.
Мекеме БШК расмий аныктабаган мобилдик тиркемелер аркылуу каражат чогултуу жөнүндө жарыялар — саясий партиянын, талапкердин шайлоо фондуна ыктыярдуу акча берүү тартибин бузууга жатарын белгиледи. Жарандардын талапкер же саясий партиянын шайлоо өнөктүгүн каржылоосуна эч кандай чектөө жок экени белгиленип, жол-жобосу түшүндүрүлдү.
Шайлоо мыйзамындагы бир нече беренелерге ылайык, талапкер же саясий партия өзүнүн шайлоо фондунун бир гана атайын эсебин ачууга укуктуу. Шайлоо фонду талапкердин же саясий партиянын өз каражатынан, жарандардын, ишканалардын ыктыярдуу кайрымдуулуктарынан түзүлөт.
