Никотин суюктугу бар электрондук тамекини өлкөгө ташып киргизүүгө 6 айга тыюу салынышы мүмкүн. Бул боюнча Министрлер кабинетинин токтомунун долбоору коомдук талкууга коюлду.
Анда никотин суюктугу бар электрондук тамекилерге, никотин берүү системдерине жана аларды колдонуу үчүн арналган картридждердеги, резервуарлардагы жана башка идиштердеги никотинди камтыган суюктуктарга тыюу салуу каралган.
Аталган токтом жаштар арасында электрондук тамекиге болгон көз карандылыкты жоюу жана жаңы муундун ден соолугун сактоо максатында иштелип чыкты.
Белгилей кетсек, быйыл 1-июлдан баштап өлкөдө электрондук чылымды колдонууга жана сатууга тыюу салынган. Чеккендерге 10 миң сом, саткандарга 65 миң сомго чейин айып салынат. Ал эми ташып келгендерге 100-120 миң сом айып каралган.
