Төө-Ашуу ашууда «Келечек»альтернативдик тоннелин курулат. Бул тууралуу Инвестициялар боюнча улуттук агенттиктен билдиришти.
Маалым болгондой бүгүн Транспорт жана коммуникациялар министрлиги, Кыргыз Республикасынын Президентине караштуу Инвестициялар боюнча улуттук агенттик жана «Тез Жол» ЖЧК башында турган компаниялардын консорциумунун ортосунда Төө-Ашуу ашуусундагы «Келечек»альтернативдик тоннелин куруу боюнча мамлекеттик-жеке өнөктөштүк жөнүндө макулдашууга кол коюлду.
Деңиз деңгээлинен 2200 м бийиктикте жайгашкан, узундугу 11,5 км түзгөн жаңы тоннель жыл бою коопсуз жүрүүнү камсыздайт. Долбоордо эки төлөм алуу пункту, жалпы 31,3 МВт кубатындагы эки кичи ГЭС жана заманбап башкаруу системасы да каралган.
Жалпы инвестициянын көлөмү 640 млн АКШ долларына жетет. Долбоор толугу менен жеке өнөктөш тарабынан каржыланат. Ал эми долбоорду ишке ашыруу жана эксплуатациялоо мөөнөтү 49 жылга белгиленген.
