Кыргыз Республикасынын Ички иштер министрлиги ички иштер органдарынын кызматкерлери тарабынан жасалган ар кандай укук бузууларга ырааттуу жана айкын түрдө чара көрүп келет.
Белгилей кетем, мыйзам бардык жарандар үчүн милдеттүү экендигин баса белгилегим келет. Кызматтык макам, атайын наам, кызмат өтөгөн мөөнөт, мурдагы жетишкендиктер же жеке шарттар мыйзамга каршы аракеттерге негиз боло албайт. Милиция кызматкери тарабынан мыйзамды же кызматтык тартипти бузган ар бир фактыга кылдат, калыс жана катуу укуктук баа берилет.
Текшерүүлөрдүн жана кызматтык териштирүүлөрдүн жыйынтыгы менен Кыргыз Республикасынын мыйзамдарына ылайык ээлеген кызмат ордунан бошотууга, ички иштер органдарынан чыгарууга жана жоопкерчиликке тартууга чейинки катуу жоопкерчилик чаралары көрүлөт.
Ички иштер министрлигинин бекем позициясы туруктуу бойдон калат: мыйзамды бузган адам ички иштер органдарынын кызматтык кийимин кийүүгө жана мамлекеттик бийликтин өкүлү болууга жол берилбейт.
Ошондой эле үй-бүлөлүк зомбулук маселесине өзгөчө көңүл бургум келет. Мындай көрүнүштү эч нерсе менен актоого болбойт: үйдөгү чыр-чатак да, эмоционалдык абал да, жеке мамилелер да себеп боло албайт. Үй-бүлө коопсуздуктун жана тынчтыктын орду болушу зарыл.
Үй-бүлөдөгү зомбулуктун ар бир фактысы ички иштер органдары тарабынан милдеттүү түрдө ыкчам чара көрүлүүгө тийиш.
Ички иштер министрлиги жабырлануучуларды коргоону, ыкчам чараларды көрүүнү жана күнөөлүүлөрдү жоопкерчиликке тартууну камсыз кылат. Бул маселеде эч кандай келишимге барууга, жоопкерчиликсиз мамилеге же маселени «жашырууга» жол берилбейт. Адамдын коопсуздугу — баарынан маанилүү.
Биз алдын алуу иштерин, өздүк курамдын ишмердүүлүгүнө көзөмөлдү, ошондой эле бардык деңгээлдеги жетекчилердин жеке жоопкерчилигин күчөтүп жатабыз. Жарандардын ички иштер органдарына болгон ишеними сөздөр менен гана эмес, конкреттүү аракеттер, туруктуулук жана жоопкерчиликтин сөзсүз камсыздалышы менен калыптанат.
Кыргыз Республикасынын Ички иштер министрлиги мындан ары да мыйзамдын чегинде ыраттуу иш алып барып, коомдук коопсуздукту камсыз кылууну, жарандардын укуктарын жана мыйзамдуу кызыкчылыктарын коргоону улантат.
