Ысык-Көл аймагында экологиялык коопсуздукту камсыздоо боюнча жүргүзүлгөн комплекстүү иш-чаралар өз натыйжасын берүүдө. Бул тууралуу ИИМдин Басма сөз кызматы билдирди.
2022-жылы Садыр Жапаровдун демилгеси менен туристтик-экологиялык милиция кызматы түзүлүп, көлдү коргоо багытында системалуу иштер башталган. Президенттин Жарлыктарынын негизинде балык уулоого мораторий киргизилип, мыйзамсыз балык уулоого каршы күрөш күчөтүлгөн.
2025-жылдын жайкы туристтик мезгилине карата Министрлер Кабинети тарабынан Бирдиктүү коопсуздук кызматы түзүлүп, курамына ички иштер органдары, өзгөчө кырдаалдар, жол-транспорт коопсуздугу, экологиялык көзөмөл жана саламаттык сактоо тармактарынын аймактык түзүмдөрү кирген.
Бирдиктүү кызматтар заманбап техникалар — автоунаалар, кайыктар, дрондор жана видеокөзөмөл каражаттары менен камсыздалып, эко-мунаралар жана кырдаал борбору ишке киргизилген. Натыйжада көлдөн эски синтетикалык торлор, таштандылар тазаланып, мыйзамсыз балык уулоо кескин түрдө азайган. Жыйынтыгында көлдүн экологиялык абалы жакшырып, биологиялык ресурстар калыбына келүүдө.
Ысык-Көл — улуттук байлык жана аны коргоо жалпы коомдун милдети.
