Лейлек райондук билим берүү бөлүмү 2026-2027-жылдагы күз-кыш мезгилине карата мектептер жана бала бакчалар үчүн көмүр сатып алуу боюнча тендер жарыялады. Бул тууралуу мамлекеттик сатып алуулар порталында маалымдалды.
Тендердин жалпы суммасы 43,7 млн сомду түзөт. Сатып алынуучу көмүр Сүлүктү кенинен казылган БК жана БР үлгүсүндөгү көмүр болушу шарт.
Көмүр Лейлек районундагы мектептерге, бала бакчаларга, «Баластан» балдар борборуна, райондук билим берүү бөлүмүнө жана борборлоштурулган бухгалтерияга жеткирилет.
Маалыматка ылайык, көмүрдү жеткирүү иштери 2026-жылдын 15-ноябрына чейин толугу менен аякташы керек.
Тендерге катышууну каалаган компаниялар Сүлүктү кенинен көмүр өндүрөрүн тастыктаган документтерди, тиешелүү лицензиясын жана ушуга окшош жеткирүүлөр боюнча иш тажрыйбасын көрсөтүүгө милдеттүү.
