Кыргызстанда абанын кескин ысышына байланыштуу электр энергиясын суткалык керектөө тарыхый эң жогорку чекке жетти. Бул тууралуу Энергетика министрлиги билдирди.
Маалыматка ылайык, 19-июлда өлкөдө суткалык электр энергиясын керектөө 50 миллион 122 миң кВт/саатты түзүп, тарыхый эң жогорку көрсөткүч катталды.
Бул өткөн жылдын ушул күнүнө салыштырмалуу 7 миллион 608 миң кВт/саатка же 18 пайызга көп. Адистер мындай өсүштү абанын кескин ысып, кондиционерлердин массалык түрдө колдонулушу менен түшүндүрүшүүдө.
Министрликтин маалыматына караганда, ашыкча жүктөмдөн улам энергетикалык жабдуулар күчөтүлгөн режимде иштеп жатат. Абанын температурасы +45°С жеткенде электр кабелдеринин өткөрүү жөндөмдүүлүгү төмөндөп, айрым тилкелерде чыңалуу күчөгөн.
Ушундан улам Бишкек шаарында жана Чүй облусунун айрым аймактарында электр кубатын убактылуу жөнгө салуу чаралары киргизилүүдө. Электр энергиясы эки сааттан ашык убакытка өчүрүлбөй турганы белгиленип, жарандар электр энергиясын үнөмдүү пайдаланууга чакырылды.
