Threads социалдык тармагында бир нече күндөн бери «Джей Доу» аталышындагы флешмоб жүрүп жатат. Ага Борбор Азия өлкөлөрүнүн жарандары, анын ичинде кыргызстандыктар да катышууда.
Флешмобдо кыргызстандык кыздар бала кезинде сексуалдык зомбулукка кабылганын айтып, башынан өткөргөн окуяларын ачык жазышууда. Айрымдары зомбулукка бир тууганынан, башкалары өгөй атасынан кабылганын билдирген.
Бул маселе 7-октябрда Жогорку Кеңештин жыйынында көтөрүлдү. Депутат Элвира Сурабалдиева балдарга карата сексуалдык зомбулук фактыларына көңүл буруп, кылмыш-жаза кодексинин 157-беренесин өтө кылдат талкуулоону сунуштады.
Жогорку Кеңештин төрагасы Марлен Маматалиев бул маселеге өзгөчө көңүл буруларын айтты.
