Бүгүндөн тарта Бишкекте № 57 жаңы автобус каттамы каттай баштады. Ал «Тунгуч-2» кичи районун тейлейт. Бул тууралуу Бишкек мэриясы билдирди.
Маалыматка ылайык, линияга «Yutong» маркасындагы 10 автобус чыкты. Алар Анкара, Ауэзов, Абдрахманов көчөлөрү жана Чүй проспектиси аркылуу айланма багыт боюнча жүрүшөт.
Шаардык бийлик өкүлдөрү каттамды ишке киргизүү кичи райондун жана чектеш аймактардын тургундарын транспорттук тейлөөнү жакшыртууга багытталганын белгилешти.
Каттамга чыгар алдында автобустар техникалык кароодон, ал эми айдоочулар медициналык кароодон өтүшөт.
