Кыргызстанда кыймылсыз мүлккө менчик укугун өткөрүү боюнча бүтүмдөрдү нотариалдык күбөлөндүрүү үчүн мамлекеттик алымдын өлчөмдөрү төмөндөтүлдү. Бул тууралуу Юстиция министрлиги билдирди.
Тиешелүү өзгөртүүлөр Министрлер кабинетинин 2026-жылдын 23-июлундагы №505 токтому менен кабыл алынган.
Өзгөртүүлөргө ылайык, накталай эмес эсептешүүдө жакын туугандардын ортосундагы бүтүмдөр үчүн алым 1 000 сомдон 300 сомго чейин азайтылды. Башка жеке жактар үчүн 2 000 сомдон 500 сомго, ал эми тараптардын бири юридикалык жак болгон учурда 5 000 сомдон 1 000 сомго чейин төмөндөтүлдү.
Накталай эсептешүүдө жакын туугандардын ортосундагы бүтүмдөр үчүн алым 10 000 сомдон 3 000 сомго, башка жеке жактар үчүн 20 000 сомдон 5 000 сомго, ал эми юридикалык жак катышкан бүтүмдөр үчүн 50 000 сомдон 10 000 сомго чейин кыскартылды.
Мындан тышкары, юридикалык жак катышкан учурда нотариалдык буйрук берүү үчүн алым өндүрүлүүчү сумманын 1 пайызын түзөт. Анын өлчөмү бир эсептик көрсөткүчтөн кем эмес жана 50 эсептик көрсөткүчтөн ашпоого тийиш.
