Аскердик тик учак кырсыктаган аймакка үч тез жардам бригадасы чыгып кетти. Бул тууралуу саламаттык сактоо жана социалдык өнүктүрүү министрлиги билдирди.
Малыматка ылайык, министрлик кырсыкка байланыштуу Ош облусунун Ноокат районунун Кичи-Алай аймагынан чакыруу түшкөнүн маалымдады.
Ноокат райондук Жалпы дарыгердик практика борборунун директорунун орун басары Эртабылды Көккөзов маалымат түшөрү менен үч тез жардам бригадасы жөнөтүлгөнүн айткан. Алар ооруканага жеткирилгенден кийин кошумча маалымат берилет.
Белгилей кетсек, коргоо министрлиги МИ-8 МТ аскердик тик учагы авариялык абалда конууга аргасыз болгонун тастыктады. Бортто 10го чукул адам болгон. Алдын ала маалымат боюнча үч киши жеңил жаракат алган, алар медициналык жардамдан баш тартканы айтылат.
