Анын айтымында, бул бир жыл мурунку видео. Бул болжолдуу ишемби 4-июль болгон. Дамир Оңолбеков ошол күнү ичкенби же ден-соолугуна байланыштуу теңселип жатканбы, эсинде жок экендигин айтат.
«Биринчиден, бул былтыры июль айында болгон. Ошол кезде бүтүндөй сот тутуму иштеп жаткан, биз баарыбыз жумушта болчубуз. Бул ишемби, жумуш эмес күн болчу. Экинчиден, менин жүрөгүм ооруйт, каарылыктын белгиси. Бул кандайча болгонун билбейм, балким, өзүмдү жаман сезгендирмин, кээде давления болуп турам. Төрт жылдан бери мен таптакыр эс алган жокмун. Азыр актанып же шылтоо айтып олтурбайм», — деди Оңолбеков.
Оңолбеков Президенттин «Сот жумушка дайыма мас абалында барат»- деген сөзүн четке какты. Ошону менен бирге кандай болгон күндө дагы президенттин багытын колдой тургандыгын айтты.
Ал эски видеону азыр кимге жана эмне үчүн жалпыга ачык жарыялоонун зарылдыгы жөнүндө комментарий берген жок.
