Министрлер кабинетинин төрагасы Улукбек Марипов жубайы менен келип Бишкектеги эмдөө жайларынын биринен вакцина сайдырып кетти.

Ал жакында республикага вакцинанын жаңы партиясы келип түшөрүн айтып, кыргызстандыктарды коронавируска каршы эмделүүгө чакырды.

«Биринчиден, эмдөө жүргүзүп жаткан бардык дарыгерлерге терең ыраазылык билдирем. Бир эки күн мурдагы өкмөттүн чукул жыйынында Кыргызстандагы жалпы мекендештерди вакцинацияга чакырдык элек. Андыктан, бүгүн атайын өзүбүз да келип алдык. Жакында эл аралык өнөктөштөрдөн вакцина алып келебиз, каражат, ташып келүү маселесин чечип жатабыз. Биздин максат — жалпы коомчулукка, улгайгандарга эмдөө жүргүзүү. Аман бололу, сак бололу», — деди ал кыргызстандыктарга кайрылып жатып.

Бүгүнкү күндө кыргызстандыктардын 0,7 пайызы гана коронавируска каршы вакцина алгандыгын ишкерлер менен жолугушуу учурунда экономика жана каржы министри Акылбек Жапаров айткан эле.

Белгилей кетсек, министрлер кабинети учурда чет мамлекеттерден коронавируска каршы эмдөө боюнча вакцина жагынан жардам берүүнү сурап, кайрылып жатат.