Тажикстанда «чек арадан мыйзамсыз өткөн» деген айып менен апрель айынын башында кармалган кыргыз жарандарынын бири беш жылга камалып, үчөөнүн соту бүгүн 16-июлга коюлган.
35 жаштагы Айбек Махмудовго укуктук колдоо болбой калды дейт жакындары. Аламүдүн районунун Василевка айылында жашаган бир тууганы Дилафруз Бакированын айтымында, иниси Айбек Махмудов апрель айынын башында Тажикстандын Жерге-Талында калган келинчегин алып келем деп барып, кармалып калган.
Ага «чек араны мыйзамсыз кесип өткөн» деп кылмыш иши козголуп, Дүйшөмбү шаарындагы тергөө абагында эки ай жаткан. Райондук сот ишти карап, 9-июлда беш жылга эркинен ажыратты. Дилафруз өзүнүн беш баласына кошуп инисинин балдарын, ата-энесин да карап жатат.
