Кара-Суу районунун Папан айыл аймагында көмүр ташып бараткан жүк ташуучу унааны көтөрө албаган көпүрөө, унаа менен бирге түшүп кетти. Бул тууралуу окуянын күбөлөрү социалдык тармактан кабарлады.
Окуя бүгүн, түшкө маал катталган. Өзгөчө кырдаалдар министригинин маалымат кызматы билдирген маалыматка ылайык, унаанын ичинде 2 жаран болгон. Бактыга жараша экөө тең аман калган.
Аталган көпүрө Ош-Папан-Кожокелен унаа жолунун 24-чакырымында жайгашкан, Папан менен Ошту байланыштырып турган. Учурда унаалар айланма жол аркылуу каттап жатат.
