Кызыл китепке кирген маралды мыйзамсыз атуу фактысы аныкталды. Бул тууралуу Жаратылыш ресурстары, экология жана тезникалык көзөмөл министрлигинин басма сөз кызматы билдирди.
Маалыматка ылайык, 31-октябрда Сары-Челекте “Туура-Арык” тилкесинде болжол менен 5 жаштагы маралдын ургачысын мыйзамсыз атып, аны союп жатышкан.
“Мыйзам бузгандар Аксы районунун Аркыт айылынын төрт тургуну болушкан. Жеке тинтүү жана айлана-тегеректи кароодо ок атуучу курал табылган эмес. Жаныбардын териси, башы жана эти материалдык далил катары алынган. Азыркы учурда Кызыл китепке кирген жаныбарды мыйзамсыз атуу фактысы боюнча материалдар тиешелүү чара көрүү үчүн укук коргоо органдарына өткөрүлүп берилди”, — деп айтылат билдирүүдө.
Эскерте кетсек, маралды мыйзамсыз кармоо үчүн айып 1 миллион сомду түзөт, ал эми өзгөчө корголуучу жаратылыш аймактарында айыптын өлчөмү эки эсеге көп.
