Токтогул ГЭСиндеги төртүнчү гидроагрегатты алмаштыруу 2022-жылдын июнь айына жылдырылды. Бул тууралуу энергетика министри Доскул Бекмурзаев Коопсуздук кеңешинин жыйынында билдирди.
Анын айтымында, подрядчынын шалаакылыгынан гидроагрегат өз убагында берилбей, иштен чыккан. «Кышты гидроагрегатсыз өткөрүүгө туура келет, орнотуу кийинки жайга жылдырылды», — деди ал.
Президент Садыр Жапаров Кыргызстанга келтирилген зыянды ким төлөй турганын сурап, ага сөгүш жарыялады.
«Сиз бул жаатта иштеп жатсаңыз дагы өз убагында чара көрө алган жоксуз. Көмүрдүн баасын да мен кийлигишмейинче төмөндөтүү мүмкүн эмес болчу. Мен сизге сөгүш жарыялайм», — деп кошумчалады ал.
