Орусиянын Ульяновск облусунда каза болгон кыргыз жарандарынын сөөгү 23-августта Кыргызстанга алып келинип, туугандарына өткөрүп берилди.
Жалал-Абад облусунан каза болгон 4 жарандын сөөгүн Ош аэропортунан Президенттин Иш башкаруучусу Каныбек Туманбаев, Президенттин Жалал-Абад облусундагы ыйгарым укуктуу өкүлү Абсаттар Сыргабаев коштоп келди. Каза болгондордун бири Сузак районунун Ленин айыл өкмөтүнүн Жыгач-Коргон айынын тургуну Азиз Каныбек уулунун сөөгү туугандарына өткөрүлүп берилди.
Облус башчысы маркумдун жакындарына көңүл айтып, кайраттуулук тиледи. Мындан сырткары каза болгондордун жакындарына ар тараптуу жардам көрсөтүүнү президент жеке көзөмөлүнө алганын белгилеп, өлкө башчысы тарабынан 300 миң сом жана Министрлер Кабинетинин Төрагасынын орун басары — Улуттук коопсуздук мамлекеттик комитетинин төрагасы Камчыбек Ташиевдин атынан берилген 50 миң сом акчалай жардамын тапшырды.
Ошондой эле, Ош облусунан каза болгон 5 жарандын да сөөгү туугандарына тапшырылды.
