Россиянын Санкт-Петербург шаарында 27 кыргызстандык ууланып ооруканага жаткырылды. Бул тууралуу Тышкы иштер министрлигинен билдиришти.
Билдирүүгө караганда, Кыргызстандын 27 жараны Санкт-Петербург шаарына курулуш иштерин аткаруу үчүн Лахт-Центрге келишкен. Россиядагы иш берүүчү «Прайдекс» ЖЧК тарабынан Кыргызстандын жарандары жатакана жана 3 маал тамак менен камсыз кылынган.
«Жарандар азыркы учурда С.П.Боткин атындагы клиникалык жугуштуу оорулар ооруканасында дарыланып жатышат. Алдын-ала маалыматтар боюнча, алардын абалы канааттандырарлык деп бааланууда. Роспотребнадзор тарабынан текшерүү жүрүп, суунун жана тамак-аштын үлгүлөрү алынган. Кыргызстандын Россиядагы элчилигинин Санкт-Петербург шаарындагы өкүлчүлүгүнүн кызматкерлери бул окуянын бардык жагдайларын такташууда»,- деп берилет маалыматта.
