Өзбекстандык, ырчы Жасур Умиров Самарканд облусунда жашы жете элек кызды зордуктады деп айыпталып жаткан кылмыш иши сотко жөнөтүлдү. Бул тууралуу жергиликтүү маалымат булактары байма-бай жазышууда.
Маалым болгондой, дагы эки адамга кылмышты жашыргандыгы жана жалган көрсөтмө бергендиги үчүн айып тагылды.
«5-январда Самарканд облусунун прокуратурасы ырчы Жасур Умировдун кылмыш ишинин материалдарын сотко өткөрдү», -деп билдирди департаменттин басма сөз кызматы.
Белгилей кетсек, 9-октябрда лицейдин 16 жаштагы окуучусун зордуктоо фактысы боюнча кылмыш иши козголгон. Бул ишке шектүү катары белгилүү ырчы Жасур Умиров кармалган. 21-декабрда облустук прокуратура ырчыга 118-берененин 3-бөлүгүнүн «а» пункту менен («18 жашка чыга элек өспүрүмдү атайылап зордуктоо» беренеси) боюнча айып тагылгандыгын жарыялаган. Учурда соттун чечими менен ал убактылуу кармоочу жайга киргизилди.
