Түштүк-Батыш бажысынын Ош облусундагы кызматкерлери республикага контрабандалык жол менен тамекинин ири партиясын алып келүү аракетине бөгөт коюшту. Бул тууралуу аталган мекеменин басма сөз кызматы билдирди.
Маалыматка ылайык, жүк «Subaru Forester” үлгүсүндөгү унаага жүктөлгөн, ал эми аны Т.Ж.О аттуу айдоочу көзөмөлдөп келген. Унааларды текшерүү учурунда 10 миң таңгак Milano соода маркасындагы тамеки табылган.
Жалпы баасы 650 миң сомдук товарлар ЕАЭБдин бажы мыйзамдарын бузуу менен коңшу мамлекеттен алынып келингени белгиленди. Факт Кылмыштардын жана жоруктардын бирдиктүү реестрине катталып, чогулган материалдар тергөө амалдарынын кароосуна өткөрүлүп берилди.
