Бишкекте жол эрежесин бузган айдоочуну атып жиберген жол тескөөчү камакка алынды. Бул тууралуу Бишкек ШИИБинин басма сөз кызматы кабарлады.
Эске салсак, кечээ 27-августта Бишкектин Гоголь -Жибек Жолу көчөлөрүнүн кесилишиндеги мечиттин жанында ок атуу орун алгандыгы боюнча Свердлор РИИБине маалымат келип түшкөн.
Ыкчам иликтөөчүлөр окуя болгон жерден 1 даана гильза менен кандын тактарын байкашкан. Бул факт боюнча Жазык кодексинин 321-беренесинин («Бийликтен аша чабуу» 1) курал же атайын каражаттарды колдонуу менен; 2) этиятсыздыктан оор зыян келтирүү менен) негизинде сотко чейинки өндүрүш иштери башталган.
Ок тийген айдоочу ооруканага жетпей каза болуп, окуяга шектелген Милициянын кайгуул кызматынын кенже инспектору Д.Ж. бүгүн, убактылуу кармоочу жайга киргизилди.
Бишкек ШИИБинин расмий маалыматы боюнча, маркум А.Ч. (1989-жылы төрөлгөн) «RAV-4» үлгүсүндөгү автоунасы менен жол эрежесин бузганы үчүн, инспектор аны токтотуп, протокол тузгөн. Ошол учурда кетип калган айдоочу кийинчерээк келип, чыр чыгарган.
«Айдоочу инспектордун талабына баш ийбей, табелдик куралын алууга аракет кылган. Ошол учурда капыстан куралдан ок атылып, айдоочуга тийген», — деп айтылат милициянын билдирүүсүндө.