Алып баруучу, блогер Назира Айтбекова жашоосундагы бактылуу жана кайгылуу көз ирмемдерди коомчулук менен бөлүшүп, турмуштук сабактар тууралуу талкуу жаратып келет. Бул ирет да, көнүлдөн орун тапкан, балким көмөкөйдө жалындаган чындыкты жазып, көнүлдөн орун алды.
Андыктан анын постун бөлушүүнү туура көрдүк. Балким сизге да ушул ой толгоо керек болуп жаткандыр.
Бүгүн атам сонун видео салып жибериптир. Жубайы экөө велосипед тээп, каткырып, жыргап атышкан видео экен. Кайра — кайра көрүп, өзүнөн өзү ууртумда жылмайуу пайда болуп, ичим кымыңдаган сүйүнүчкө толду. “Жарын таап , жарыктык ачылып, жашагысы келип, өңүнө чыкканын карачы?!” дедим. Атам мындай үлгүсү менен “Канча жашта болбосоң да, өз адамыңа жолуга аласың”, “ Адамга адам керек”, “ Ар бир адам бактылуу болууга акысы бар”, “ Ар бир адам түгөйүн күтөт” сындуу ж.б сонун сабактарды берди. Балким өзү аңдабагандыр, бирок анын бактысы мени бактылуу болууга үндөгөнүн айт! “Ата — эне балага сөзү менен эмес иши менен үлгү болот алат” деген сөздү тастыктады . — Карачы, — дедим ичимден,- жаныңда жарың болсо , толукталат турбайсыңбы!
Ар кыл адам жанашкысы келди мага. Эркек катары күчтүү, беттегенин бербеген, физикалык жактан да, духу да күчтүү, чөнтөгү да жакшы адам жолукту, бирок көкүрөгүмдү көкүрөгү окуй алган жок. Сезимдик деңгээлде байланыша алган жокпуз. Байы да, бийлиги да колунда бар адамдар жолукту, бирок алардын колундагы дөөлөтүнөн, коомдогу бийик даражасынан сырткары мага бере турчу эч нерсеси жок экен. Сулуу, керилген өң десең өңү, түс десең түсү ийги адамдар жолукту. Чырайын чын эле чайга чылап ичпейт экенсиң.Адам адамды байлыгынан, бийлигинен, өңүнөн, төшөгүнөн тааныбайт экен! Адам адамды көкүрөгүнөн тааныйт экен. Көңүлүңдү тыңшай билген, сезимиңди окуй алган, бир толкундагы , көңүл кулпуңа , көңүл ачкычы төп келгени маанилүү экен! Ошол биринчи орунда , алдыңкы планда турат тура. А калган чырай, байлык , бийлик, ийгилиги , күчтүүлүгү жана башкасы кийинки фондо тура берет. Көңүлүңдү тыңшай албаганга тагдырыңды байлаш кыйын.Кыздар, сенин сезимиң мн эсептеше алган, көңүлүңдү сыйлап, ишенимиңди бийик туткан, чын эле арзып калган адамыңдын этегин кое бербегиле!
