Жыл башынан тарта «Айыл чарбасын каржылоо-14» программасы боюнча дыйкан-фермерлерге жалпы 5 млрд сомдон ашык жеңилдетилген насыя берилди. Бул тууралуу Айыл чарба министрлиги билдирди.
Маалым болгондой, насыялар «АБанк» жана «Элдик Банк» аркылуу 6 пайыздык үстөк менен берилип, аларды 3 жылга чейин кайтаруу мүмкүнчүлүгү каралган.
Жалпы алганда бул эки банк аркылуу 7 миң 694 насыя берилген.
«АБанк» аркылуу жалпы 2 млрд 465,8 млн сомго 3 миң 750 насыя берилген. Анын ичинен өсүмдүк өстүрүү багытына 263,6 млн сом (512 насыя), мал чарбачылыгына 2 млрд 165,2 млн сом (3 миң 204 насыя), ал эми сууну үнөмдөөчү технологияларга 37 млн сом (34 насыя) багытталган. «Элдик Банк» аркылуу болсо жалпы 2 млрд 608,2 млн сом өлчөмүндө 3 миң 944 насыя берилген. Бул каражаттардын 163,5 млн сому өсүмдүк өстүрүүгө (303 насыя), 2 млрд 423,5 млн сому мал чарбачылыгына (3 миң 624 насыя), 21,2 млн сому сууну үнөмдөөчү технологияларга (17 насыя) бөлүнгөн.
Программа өлкөдө айыл чарба тармагын колдоого жана фермерлердин өндүрүшүн кеңейтүүгө багытталган.
