Ак-Ордодо мончодо элди тапанча менен коркуткан 27 жаштагы жаран кармалды. Бул тууралуу Милициянын кайгуул кызматы кабарлады.
Маалыматка ылайык, кечээ, 29-ноябрда саат 21:10дөр чамасында Ак-Ордо конушундагы Гагарин көчөсүндө жайгашкан мончолордун биринде белгисиз жаран тапанча менен жарандарды коркутуп жаткандыгы тууралуу маалымат түшкөн.
25 жаштагы И.Н. аттуу жаран арыз менен кайрылып, болжол менен жашы 25-30 жаштагы белгисиз адам арыз ээсин «Тапанча менен атып салам»,- деп коркутуп, оозго алгыс сөздөр менен сөккөн.
Ыкчам кармоо иш-чараларынын негизинде, шектүү катары 27 жаштагы Ж.А. аттуу жаранды кармаган. Ал Сокулук райондук милициясынын тергөө кызматына жеткирилген.
Аталган факт Сокулук райондук Кылмыштардын жана жоруктардын бирдиктүү реестрине катталып, Жазык кодексинин 266-берененин (“Ээнбаштык”) негизинде сотко чейинки өндүрүшкө алынды.
