Системалуу түрдө аялын уруп-токмоктоп жүргөн жаран кармалганын УКМКдан билдиришти.
Маалыматка ылайык, күйөөсү тарабынан ур-токмокко кабылган жаран кайрылган. Ал учурда Бишкектеги медициналык мекемелердин биринде дарыланууда жана үй-бүлөлүк психологдун кеп-кеңешин алып жаткандыгын айтылган.
Тергөөдө Р.У.Н. үй-бүлөлүк чыр-чатактардан улам жубайынын ден соолугуна ар дайым залал келтирип, физикалык зыян келтирүү менен коркутуп, аялына моралдык-психологиялык кысым көрсөтүп, ошондой эле анын туугандарынын ишенимине кирип, алдамчылык жолу менен 30 миң АКШ долларын алып, көпкө чейин кайтарып бербей келгени аныкталды.
Ошол эле учурда аялы алган акчаны кайтарып берүүнү суранганда аталган жаран системалуу түрдө ур-токмокко алып, денесине залал келтирип турган.
«Ден соолукка зыян келтирүү жана алдамчылык фактысы боюнча кылмыш иши козголду. Учурда ал Бишкек ШИИБнин убактылуу кармоочу жайына киргизилип, системалуу түрдө ур-токмокко алуу фактысы боюнча соттук-медициналык экспертиза дайындалды. Керектүү тергөө иш-чаралары жүргүзүлүп, анын жыйынтыгында юридикалык баа берилип, тиешелүү чаралар көрүлөт»,- деп берилет билдирүүдө.
