Аялдын моюнунан алтын чынжырчасын жулуп алып, качып кеткен шектүү кармалды. Бул тууралуу Ош ШИИБдин басма сөз кызматы билдирди.
Маалыматка ылайык, ушул жылдын 10-сентябрь күнү кечинде, Ош шаарынын тургуну 2000-жылы туулган Т.Б аттуу аял кишинин моюнундагы алтын чынжырчасын (цепочка) белгисиз атуул жулуп, качып кеткен.
Кылмышка шектүү катары Жалал-Абад облусунун Аксы районунан убактылуу Ош шаарына келип, ар кайсы батирде жашап жүргөн 1984-жылы туулган Н.Н. кармалды.
«Шектүү кармалган учурда уурдалган алтын чынжырча анын чөнтөгүндө болгон. Сатууга үлгүрбөй калгандыгы аныкталып, ээсине кайтарылды. Ал мурда адам өлтүрүүгө аракет жасагандыгы үчүн соттолуп, жаза мөөнөтүн өтөп келген. 12-сентябрь күнү Ош шаардык соту тарабынан шектүүнү тергөө аяктаганга чейин, 2 ай абакта кармоого санкция берилди»,-деп берилет билдирүүдө.
