Президент Садыр Жапаров кол койгон жарлыкка ылайык, Азис Сапаралиев жаратылыш ресурстары, экология жана техникалык көзөмөл министринин милдетин аткаруучу болуп дайындалды. Бул тууралуу президенттин басма сөз кызматы билдирди.
Эми анын талапкерлиги Жогорку Кеңешке макулдашуу үчүн киргизилет. Парламент учурда каникулда болгондуктан Азис Сапаралиев сентябрга чейин министрдин милдетин аткаруучу статусунда иш алып барат.
Эске салсак, мурдагы министр Мелис Тургунбаев 26-июнда кызматынан бошотулуп, кийин Улуттук банктын төрагасы болгон. Ал аталган кызматты 2023-жылдын мартынан бери аркалап келген.
