Министрлер кабинети Баткен облусунда 28-30-апрелдеги кыргыз-тажик мамлекеттик чек арасындагы окуяларда жабыркаган салык төлөөчүлөргө мамлекеттик колдоо көрсөтүү чаралары жөнүндө чечим кабы алды. Бул тууралуу министрлер кабинетинин басма сөз кызматы билдирди.
Маалыматка ылайык, 2021-жылдын 1-апрелинен 31-декабрга чейинки мөөнөттө Баткен облусундагы окуялардын кесепетинен жабыркаган ишкерлердин тизимине киргизилген салык төлөөчүлөр төмөнкү салыктарды төлөөдөн бошотулду:
- киреше салыгы;
- пайда салыгы;
- кошумча нарк салыгы (импортко карата кошумча нарк салыгынан тышкары);
- сатуу салыгы;
- милдеттүү патенттин негизиндеги салык;
- ыктыярдуу патенттин негизиндеги салык;
- бирдиктүү салык.
Көрсөтүлгөн салык төлөөчүлөр 2021-жылдын 1-апрелинен 30-сентябрына чейинки мезгилде пайда болгон салык жана камсыздандыруу төгүмдөрү боюнча карыздарынын суммасы боюнча мөөнөтүн кийинкиге жылдыруу же бөлүп төлөө жөнүндө арызды салык органына берүүгө укуктуу.
Бул жеңилдик кенди кайра иштетүүчү, кен казуучу жана акциздик товарларды чыгаруучу ишканалардан, мунай продуктуларын сатуучу субъектилерге тиешеси жок. Ошондой эле камсыздандыруу төгүмдөрүн өз убагында төлөбөгөнү үчүн туум көрсөтүлгөн салык төлөөчүлөргө да колдонулбайт.