Бишкек шаарында адам өлтүрүүгө шектүү жаран кармалды. Бул тууралуу Октябрь РИИБдин басма сөз кызматы билдирди.
Маалыматка ылайык, 3-сентябрь күнү эртең менен милицияга Көк-Жар конушундагы үйдө зомбулук менен өлтүрүлгөн аял кишинин сөөгү табылганы тууралуу билдирүү келип түшкөн. Айтылган дарекке ыкчам тергөө тобу барып, маркумдун өздүгүн аныкташкан. Ал 1972-жылы туулган М.З. экени белгилүү болду.
Бул факт Жазык кодексинин 130-беренеси (Адам өлтүрүү) менен Кылмыштардын жана жоруктардын бирдиктүү реестрине катталган.
Октябрь РИИБдин №4 шаардык милиция бөлүмчөсүнүн кызматкерлери кылмыштын изи сууй электе шектүүнү — 1991-жылы туулган И.Э.ни кармашты. Ал убактылуу кармоочу жайга киргизилди.
Сурак учурунда шектүү окуя болгон күнү мас болгонун, маркум менен уруша кетип, аны катуу буюм менен муунтуп салганын айткан. Учурда тергөө уланууда.