Бишкек шаарында 2025-жылдын биринчи кварталында 2,5 миңге жакын мыйзамсыз курулуш буздурулду. Ал эми жыл башынан бери демонтаждалган объектилердин саны 9 миңден ашканы айтылды. Бул тууралуу мэр Айбек Жунушалиев түз эфирде билдирди.
Аламүдүн кичи районундагы 24 күркөнүн ээлери бийликтин убадалары аткарылбай жатканын айтып нааразы болушту. Алар башка мыйзамсыз объектилерге чара көрүлбөй жатканын белгилешти.
Мэр мыйзамды бузган бардык жарандар жооп берерин айтып, шаар боюнча мыйзамсыз курулуштар аныкталган жерлерде иштер улана турганын билдирди.
Учурда Бишкек жана Ош шаарларында “кызыл сызыкка” чыгып кеткен жана мыйзамсыз салынган объектилерди бузуу иштери жүрүп жатат. Бул айрым тургундардын нааразылыгын жаратууда.
Мындай жолугушуулар президент Садыр Жапаровдун тапшырмасынын негизинде өлкө аймактарында уюштурулууда.
