Бишкекте колдонуудан чыккан автотранспорт каражаттарын сатуу боюнча аукцион болот. Бул тууралуу мэриядан билдиришти.

“Муниципалдык мүлктү башкаруу боюнча департамент Садыр Жапаровдун дагы келе турган автобустарды жайгаштыруу үчүн эскилиги жеткен автотранспорт каражаттарын утилизациялоо жөнүндөгү тапшырмасын аткаруу максатында, 27-ноябрда “Бишкек жүргүнчүлөр автотранспорт ишканасы” муниципалдык ишканасынын жана Бишкек шаарынын саламаттыкты сактоо башкармалыгынын автобазасынын балансындагы эскилиги жеткен 165 даана автотранспорт каражаттарын сатуу боюнча ачык аукцион жарыялайт” – деп айтылат маалыматта.

Ачык аукционго катышуу укугун алуу үчүн арыз ээси Бишкек шаарынын мэриясынын Муниципалдык мүлктү башкаруу боюнча департаментине төмөндөгү документтерди тапшыруусу зарыл:

— ЛОТтун номерин көрсөтүү менен ачык аукционго катышуу ниети жөнүндө жазуу жүзүндөгү арыз;

— жеке арыз ээсинин инсандыгын ырастоочу документ;

— арыз берүүчү юридикалык жактын жетекчиси экендигин ырастоочу документ же жеке адамдын же юридикалык жактын-арыз берүүчүнүн атынан иш алып баруу укугуна ишеним кат;

— кепилдик төлөмдүн (депозиттин) төлөнгөндүгүн тастыктаган төлөм документтери.

Арыздар 13-ноябрга чейин Бишкектеги Чокморов көчөсү 246 дареги боюнча кабыл алынат.