Бишкекте жөө жүргүнчүнү сүзүп кеткен айдоочу кармалды. Бул тууралуу борбор калаанын Патрулдук милиция кызматынын башкармалыгынын басма сөз кызматынан билдиришти.
Анын айтымында, 19-январда саат 04.50дө Курманжан Датка жана Фрунзе көчөлөрүнүн кесилишинде белгисиз автоунаадагы айдоочу 38 жаштагы бишкектик аялды сүзүп, качып кеткен. Кырсыктын кесепетинен жабырлануучу ооруканага жеткирилген.
Патрулдук милиция кызматкерлери тарабынан 26 жаштагы Volkswagen Vento үлгүсүндөгү автоунаанын айдоочусу кармалып, Бишкек ШИИБдин тергөө бөлүмүнө жеткирилген. Факт Кылмыштардын жана жоруктардын бирдиктүү реестрине катталды.
