Борбор калаадагы №6 ооруканада жаңы корпус пайда болот. Бул тууралуу Бишкек мэриясынын басма сөз кызматы билдирди.
Анын айтымында, макулдашуу вице-мэрлер Айжан Чыныбаева, Азамат Сагындык уулу жана Катар кайрымдуулук уюмунун «Катар Черити» филиалынын директорунун орун басары Апсалман Хомамдын жолугушуусунда болгон.
Тараптар Ак-Өргө турак-жай конушундагы фельдшердик-амбулаторияга тез жардам станциясынын курулушун талкуулашты, ал жерде буга чейин фундамент жана дубалдары тургузулган.
Инвестор ошондой эле Бакай-Ата конушундагы фельдшердик-акушердик пункттун курулушун биргелешип каржылоого даярдыгын билдирди. Ал жерде 5 миңден ашуун тургун жардам ала алышат.
«Дагы бир жакшы жаңылык — тараптар №6 шаардык клиникалык ооруканасына медициналык имарат куруу боюнча жаңы долбоорду ишке киргизүүнү макулдашты», — деп берилет маалыматта.
