Жакынкы күндөрү Жогорку Кеңеш Борбордук шайлоо комиссиясынын жаңы курамын карайт. Мыйзам боюнча 12 мүчөдөн турган комиссиянын 6 мүчөсүн Президент, алтоону Парламенттик фракциялар сунуштайт.

Борбордук шайлоо комиссиясы 12 адамдан турат. Үчтөн бири аялдар квотасына берилип, үч эркек жана үч аял мамлекет башчысынын квотасы боюнча көрсөтүлөт. Парламенттик фракцияларга аялдар квотасы каралган эмес.

Бүгүнкү күндө БШК мүчөлүгүнө парламенттик фракциялар өз талапкерлерин сунуштап, тизмеси ачыкталган.

• КСДП фракциясы экс-депутат, Ысык-Көл жана Ош облустарынын мурдагы ыйгарым укуктуу өкүлү Узарбек Жылкыбаевдин талапкерлигин көрсөттү.
• «Республика — Ата Журт» Бишкек АШКнын төрагасы Кайрат Маматовду жана депутат Таабалды Тиллаевди колдоого алды.
• «Кыргызстан» фракциясы дагы эки талапкерди — БШКнын учурдагы мүчөсү Акылбек Эшимовду жана ушул эле фракциядан мурда депутат болгон Чолпон Эсенаманованы сунуш кылды.
• «Өнүгүү-Прогресс» фракциясы партиялашы Тынчтык Шайназаровдун талапкерлигин көрсөттү.
• «Бир Бол» БШК башчысынын орун басары Абдыжапар Бекматовду алып чыкты.
• «Ата Мекен» «Кыргызпочтасынын» экс-директору Марс Наспеков менен Эсеп палатасынын мурдагы төрагасы Искендер Гайпкуловдун талапкерлигин көрсөтүүдө.