Өлкөдө иретсиз пайда болгон таштанды полигондору курч көйгөй бойдон калууда. Бул тууралуу жаратылыш ресурстары, экология жана техникалык көзөмөл министри Медер Машиев Жогорку Кеңештин агрардык комитетинде билдирди.
Министр Бишкектеги таштанды полигону боюнча маселе таштанды кайра иштетүүчү заводдун курулушу менен чечилгенин баса белгиледи.
«Административдик-аймактык реформанын алкагында республика боюнча иретсиз полигондордун саны 411ден 290го кыскарды. Биз Чүй облусунун бардык аймагынан таштандыларды аталган заводго ташууну пландап жатабыз, ушундай жол менен заводдун кубаттуулугун жогорулаткыбыз келет», — деп кошумчалады Машиев.
